మన తెలుగు రాష్ట్రాలలో సుప్రసిద్ధ నరసింహ క్షేత్రాలలో సింహాచలం ఒకటి. ఈ క్షేత్రంలో స్వామివారు శ్రీ వరాహ లక్ష్మీ నరసింహ స్వామిగా కొలువైయున్నారు. ఈ బ్లాగ్ పోస్ట్లో, మనం స్వామివారి ఆలయ చరిత్ర, విశేషాలతో పాటుగా ఏ విధంగా అక్కడికి చేరుకోవాలి మరియు వసతి సౌకర్యాల గురించి కూడా వివరంగా తెలుసుకుందాం.
సింహాచలం ఆలయ ఆవిర్భావం - ప్రహ్లాదుడి కథ
హిరణ్యకశ్యపుడు తన కుమారుడైన ప్రహ్లాదుడిని ఎలాగైనా చంపాలని నిర్ణయించుకున్నాడు. అందులో భాగంగా, ప్రహ్లాదుడిని సముద్రంలో పడవేసి, బయటికి రాకుండా ఒక పర్వతాన్ని అతనిపై వేయమని ఆదేశించాడు. ఒక పెద్ద పర్వతాన్ని ప్రహ్లాదుడి మీద వేయబోగా, శ్రీమహావిష్ణువు వెంటనే ప్రత్యక్షమై, ఆ పర్వతాన్ని తన కోపంతో ఊదగా, ఆ పర్వతం కొన్ని మైళ్ళ దూరంలో పడింది. ప్రహ్లాదుడిని కాపాడిన అనంతరం, స్వామి ఈ పర్వతం మీద తాను శ్రీ వరాహ లక్ష్మీ నరసింహ స్వామిగా కొలువై ఉంటానని చెప్పి స్వయంభువుగా ఆవిర్భవించారు. శ్రీమహావిష్ణువు యొక్క నోటి ఊపిరిచేత కొట్టబడింది కాబట్టి, ఆ పర్వతానికి సింహశైలము అని పేరు వచ్చిందని పురాణాలు చెబుతున్నాయి.
హిరణ్యకశ్యపుడు మరణించిన తర్వాత, ప్రహ్లాదుడు ఈ కొండపైననే స్వామిని సేవించేవాడని ప్రతీతి. ఇక్కడ ఉన్న స్వామివారిని దర్శించడానికి 33 కోట్ల దేవతలు, పరమశివుడు, మరియు నదులు కూడా చైత్ర శుద్ధ ఏకాదశి నాడు ఇక్కడికి వచ్చాయని పురాణాలు తెలుపుతున్నాయి. ఆ పరమేశ్వరుడే తాను ఇక్కడ త్రిపురాంతక స్వామి పేరుతో క్షేత్రపాలకుడై ఉంటానని అన్నారని, అలాగే గంగా, యమునా, సరస్వతి నదులు కూడా గంగ ధారా అన్న పేరుతో ప్రవహిస్తూ తమను స్వామివారి పూజాది కార్యక్రమాలలో ఉపయోగించాలని కోరుకున్నాయని మనకు పురాణములు చెబుతున్నాయి.
అక్షయ తృతీయ నాడు జరిగే అద్భుత చందనోత్సవం!
ఇక్కడ స్వామివారికి వైశాఖ తృతీయ, అనగా అక్షయ తృతీయ నాడు చందనోత్సవం ఎంతో ఘనంగా జరుగుతుంది. ఆ రోజు స్వామివారు భక్తులకు స్వస్వరూపంలో దర్శనం అందిస్తారు. సంవత్సర కాలంలో కేవలం అక్షయ తృతీయ రోజున మాత్రమే స్వామివారి దర్శనం, చందనం లేకుండా భక్తులకు లభిస్తుంది. ఈ ఉత్సవం గురించి ఒక ఆసక్తికరమైన పురాణగాథ ఉంది.
కృతయుగం పూర్తియై ప్రహ్లాదుడు స్వామివారిలో ఐక్యమైన తరువాత, స్వామివారి మూలమూర్తికి పుట్ట పట్టేసింది. తరువాత త్రేతాయుగం కాలంలో పురూరవ చక్రవర్తి మరియు ఊర్వశి విమానంలో వెళ్తున్నప్పుడు, వారి విమానం ఈ కొండపైన ఆగిపోయింది. అప్పుడు ఊర్వశి, తాను దేవతలతో కలిసి కృతయుగంలో శ్రీ వరాహ లక్ష్మీ నరసింహ స్వామివారిని ఇక్కడ దర్శించినట్టు, ఆ స్వామివారి దివ్య మహిమ వలనే ఈ విమానం ఆగిందని పురూరవ చక్రవర్తికి చెప్పింది.
దానితో చక్రవర్తి స్వామివారి మూలమూర్తి కొరకు ఈ కొండపైన 3 రోజులపాటు వెతకగా, పుట్టలో స్వామివారి దర్శనం వైశాఖ శుద్ధ తదియ నాడు జరిగింది. అప్పుడు పురూరవ చక్రవర్తి ఆ పుట్టను ఆవు పాలు పోసి కరిగించి, మూల మూర్తిని బయటకు తీశారు. అంతట ఆ నరసింహ స్వామి తన నిజరూప దర్శనం కేవలం వైశాఖ శుద్ధ తదియ నాడు మాత్రమే అందిస్తానని, మిగిలిన తిథులలో తనను చందనంతో కప్పివేయాలని కోరారు. ఆనాటి నుండి నేటివరకు ప్రతి ఏటా స్వామి కేవలం చందనోత్సవం జరిగే అక్షయ తృతీయ నాడు మాత్రమే తన స్వస్వరూపాన్ని భక్తులకు అందిస్తారు. ఇది భక్తులకు ఒక అద్భుతమైన, అరుదైన దర్శన భాగ్యం.
సింహాచలం చేరుకోవడం ఎలా?
సింహాచలం విశాఖపట్నం బస్ స్టాండ్ నుండి సుమారు 18 – 20 కిలోమీటర్ల దూరంలో ఉంది. మన తెలుగు రాష్ట్రాల నుండి విశాఖపట్నం వెళ్ళడానికి అనేక రైళ్ళు మరియు బస్సు సదుపాయాలు అందుబాటులో ఉన్నాయి. సింహాచలం వెళ్ళాలనుకునేవారు ముందుగా విశాఖపట్నం చేరుకొని, అక్కడినుండి మనకు అనేక బస్సులు సింహాచలం కొండపైకి ఉన్నాయి. అలాగే ఆటో లేదా క్యాబ్ ద్వారా కూడా చేరుకోవచ్చు.
సింహాచలంలో వసతి
సింహాచలంలో దేవస్థానం వారి రూమ్స్ అందుబాటులో ఉంటాయి. వీటిని దేవస్థానంలో కానీ లేదా Online AP మీసేవ వెబ్సైట్లోని ఎండోమెంట్ విభాగంలో కానీ బుక్ చేసుకోవచ్చు. సింహాచల దేవస్థానం వారి రూమ్స్ ధరలు సుమారు రూ. 200/- నుండి రూ. 2000/- వరకు ఉంటాయి, భక్తుల సౌకర్యార్థం వివిధ ధరలలో లభిస్తాయి.
శ్రీ వరాహ లక్ష్మీ నరసింహ స్వామిని దర్శించి, ఆ దివ్య శక్తిని అనుభూతి చెందడానికి సింహాచలం తప్పక సందర్శించాల్సిన పుణ్యక్షేత్రం. మీరు ఎప్పుడైనా సింహాచలం వెళ్ళారా? మీ అనుభవాలను మాతో పంచుకోండి!
గోవింద శరణాగతి మాల (గోవింద నామాలు) చదువుట లేదా వినుట కొరకు క్లిక్ చేయుము.
